ເງື່ອນໄຂທົ່ວໄປຂອງປະກັນໄພ ຕອນທີ 2
ໃນສະບັບທີ່ແລ້ວ, ພວກເຮົາໄດ້ນຳສະເໜີຄຳສັບພື້ນຖານທີ່ຖືກນຳໃຊ້ທົ່ວໄປໃນສັນຍາການປະກັນໄພ. ໃນຄວາມຮູ້ເລື່ອງປະກັນໄພສະບັບນີ້, ພວກເຮົາຈະນຳສະເໜີກ່ຽວກັບຄຳສັບອີກຫຼາຍຢ່າງທີ່ຖືກນຳໃຊ້ໃນສັນຍາການປະກັນໄພ.
ໄລຍະການພິຈາລະນາສັນຍາການປະກັນໄພ (Free-look period) ແມ່ນໝາຍເຖິງ ໄລຍະເວລາທີ່ເຈົ້າຂອງສັນຍາສາມາດຍົກເລີກສັນການປະກັນໄພໂດຍທີ່ບໍ່ເສຍຄ່າທຳນຽມໃດໆ. ເມື່ອທ່ານຍົກເລີກສັນຍາ, ບໍລິສັດປະກັນໄພ ຈະສົ່ງເງິນຄ່າທຳນຽມທີ່ທ່ານຈ່າຍໄປໃນຂັ້ນຕົ້ນຄືນ ພ້ອມລົບຄ່າກວດສຸຂະພາບ (ຖ້າມີ) ໃນເວລາທີ່ທ່ານໃຊ້ໃນການປະກອບຟອມ. ບໍລິສັດປະກັນໄພ ຈະໃຫ້ໄລຍະເວລາການພິຈາລະນາການປະກັນໄພ ປະມານ 10 – 21 ວັນ ຫຼັງຈາກແຜນປະກັນໄພຊີວິດມີຜົນບັງຄັບໃຊ້.
ໄລຍະຜ່ອນຜັນ (Grace period) ແມ່ນໝາຍເຖິງ ຂໍ້ກຳນົດໃນສັນຍາປະກັນຊີວິດ ທີ່ອະນຸຍາດໃຫ້ການຈ່າຍຄ່າທຳນຽມປະກັນໄພຫຼັງຈາກວັນທີ່ຄົບກຳນົດຈ່າຍ. ຖ້າຫາກວ່າເຈົ້າຂອງສັນຍາ ຈ່າຍຄ່າທຳນຽມໃນຊ່ວງໄລຍະຜ່ອນຜັນນີ້, ບໍລິສັດ ປະກັນໄພຈະບໍ່ຄິດໄລ່ຄ່າປັບ ໃໝໃດໆ ແລະ ສັນຍາຍັງຄົງດຳເນີນຢູ່ ເຊິ່ງໄລຍະຜ່ອນຜັນແມ່ນ 30 ວັນ.
ມູນຄ່າເວນຄືນ (Cash surrender value) ແມ່ນໝາຍເຖິງ ຈຳນວນເງິນທີ່ບໍລິສັດປະກັນໄພຈ່າຍໃຫ້ແກ່ເຈົ້າຂອງສັນຍາທີ່ຕ້ອງການຈະຍົກເລີກສັນຍາການປະກັນໄພກ່ອນຈະຄົບອາຍຸສັນຍາ ຫຼື ກ່ອນເຫດການຄຸ້ມຄອງຈະເກີດຂຶ້ນ. ໃນກົດໝາຍການປະກັນໄພຂອງປະເທດລາວ, ສັນຍາການປະກັນໄພຈະບໍ່ມີການສົ່ງມູນຄ່າເວນຄືນໃນໄລຍະສອງປີທຳອິດ.
ເງື່ອນໄຂສັນຍາຂາດອາຍຸ (Lapsed policy) ແມ່ນໝາຍເຖິງ ສັນຍາທີ່ຂາດອາຍຸເນື່ອງຈາກບໍ່ມີການຈ່າຍຄ່າທຳນຽມປະກັນໄພ ແລະ ການຈ່າຍມູນຄ່າເວນຄືນແມ່ນສິ້ນສຸດລົງໃນສັນຍາການປະກັນໄພ. ເມື່ອສັນຍາຂາດອາຍຸ, ບໍລິສັດປະກັນໄພປະກັນໄພຈະບໍ່ໃຫ້ການຄຸ້ມຄອງໃດໆ.
ການຟື້ນຄືນສັນຍາ (Reinstatement) ແມ່ນໝາຍເຖິງກໍລະນີທີ່ເຈົ້າຂອງສັນຍາບໍ່ສາມາດຈ່າຍຄ່າທຳນຽມປະກັນໄພ ສົ່ງຜົນສະທ້ອນໃຫ້ ສັນຍາຖືກຍົກເລີກ ແລະ ການຄຸ້ມຄອງປະກັນໄພສາມາດຕໍ່ອາຍຸໄດ້. ຂະບວນການນີ້ແມ່ນການຟື້ນຄືນສັນຍາປະກັນໄພ. ເພື່ອໃຫ້ບໍລິສັດປະກັນໄພ ຟື້ນຄືນສັນຍາການປະກັນໄພຂອງທ່ານ, ເຈົ້າຂອງສັນຍາຕ້ອງຈ່າຍຄ່າທຳນຽມປະກັນໄພທີ່ຄ້າງຈ່າຍທັງໝົດ ແລະ ສັນຍາກໍ່ຈະມີຜົນບັງຄັບໃຊ້ຄືນ.
ຂໍ້ຍົກເວັ້ນ (Exclusions) ແມ່ນໝາຍເຖິງ ກໍລະນີ ທີ່ບໍລິສັດປະກັນໄພບໍ່ໃຫ້ການຄຸ້ມຄອງ ແລະ ບໍ່ມີການຈ່າຍຜົນປະໂຫຍດໃດໆ. ເງື່ອນໄຂເຫຼົ່ານີ້ ຖືກຍົກເວັ້ນອອກຈາກເຫດການທີ່ຄຸ້ມຄອງ. ຕົວຢ່າງ: ການເສຍຊີວິດຈາກສົງຄາມ, ເສຍຊີວິດຈາກການເມົາແລ້ວຂັບ, ຄວາມຜິດທາງອາຍາ, ແລະ ພະຍາດອື່ນໆທີ່ມີມາກ່ອນ.
ຖ້າທ່ານມີຄຳຖາມເພີ່ມເຕີມ, ກະລຸນາສົ່ງໄປທີ່ info@prudential.la