ພຣູເດັນໂຊລ໌ເລິີ່ມໃຫ້ບໍລິການການຂາຍປະກັນໄພຊີວິດໃນລາວ
ພຣູເດັນໂຊລ໌ ຄັອບພໍເຣຊັ້ນ ອາຊີ (Prudential Corporation Asia), ເປັນສ່ວນໜຶ່ງຂອງບໍລິສັດ ພຣູເດັນໂຊລ໌ ມະຫາຊົນ (Prudential plc) ຈາກສະຫະຣາດຊະອານາຈັກອັງກິດ ໄດ້ເລິີມໃຫ້ບໍລິການການຂາຍປະກັນໄພຊີວິດໃນ ສາທາລະນະລັດ ປະຊາທິປະໄຕ ປະຊາຊົນລາວ (“ລາວ”) ຊຶ່ງເປັນ ບໍລິສັດ ພຣູເດັນໂຊລ໌ປະກັນໄພຊີວິດ (ລາວ) ຈຳກັດ (ພຣູເດັນໂຊລ໌ ລາວ), ບໍລິສັດ ພຣູເດັນໂຊລ໌ ສະໜອງຜະລິດຕະພັນປະໄພຊີວິດທີ່ປົກປ້ອງ ຄຸ້ມຄອງ ແລະ ສະສົມທືນທີ່ເໝາະສົມກັບຄວາມຕ້ອງການຂອງຄົນລາວ.
ພຣູເດັນໂຊລ໌ປະກັນໄພຊີວິດໄດ້ດຳເນີນທຸລະກິດໃນເອຊີ ມາຕັ້ງແຕ່ປີ ຄສ.1923 ແລະມີຮາກຖານການໃຫ້ບໍລິການທາງດ້ານການເງິນທີ່ຫຼາກຫຼາຍ ເພື່ອຕອບສະໜອງຄວາມຕ້ອງການຂອງຄອບຄົວຄົນອາຊີທີ່ມີໜ່ວຍງານຢູ່ 13 ປະເທດ. ບໍລິສັດ ໄດ້ເປີດຫ້ອງການຜູ້ຕາງໜ້າຢູ່ນະຄອນຫຼວງວຽງຈັນໃນເດືອນມີນາ ປີ 2015 ແລະ ເມື່ອບໍ່ດົນທີ່ຜ່ານມານີ້ທາງບໍລິສັດກໍ່ໄດ້ຮັບໃບອະນຸຍາດການດຳເນີນທຸລະກິດເຕັມຮູບແບບຈາກກະຊວງການເງິນ.
ບໍລິສັດປະກັນໄພຊີວິດພຣູເດັນໂຊລ໌ໄດ້ຈັດຕັ້ງ ຍຸດທະສາດແລະການຂາຍປະກັນໄພຜ່ານລະບົບທະນາຄານ ແລະໄດ້ຮ່ວມມືກັບ ທະນາຄານ ເອຊີລິດາ ລາວ ຈຳກັດ (“ACLEDA Bank”) ເຊິ່ງເປັນໜຶ່ງໃນທະນະຄານການຄ້າ ຊັ້ນນຳ ທີ່ມີສາຂາຫຼາຍກວ່າ 40 ສາຂາໃນສປປ ລາວ. ໃນການເລີ່ມຕົ້ນການໃຫ້ບໍລິການທາງດ້ານປະກັນໄພຊີວິດ ບໍລິສັດພຣູເດັນໂຊລ໌ (ລາວ) ຈະນຳສະເໜີຜະລິດຕະພັນໃຫ້ແກ່ລູກຄ້າຜ່ານທະນາຄານ ເອຊີລິດາ (ລາວ) ໂດຍ ຜ່ານສາຂາຕ່າງ, ເຊິ່ງໃນເບື່ອງຕົ້ນຈະເລີ່ນຂາຍຢູ່ເຂດນະຄອນຫຼວງວຽງຈັນ.
ທ່ານນາງ ຄຳໄພ ວິທາໄຊ, ຫົວໜ້າ ກົມຄຸ້ມຄອງການເງິນລັດວິສາຫະກິດ ແລະ ການປະກັນໄພ, ກະຊວງການເງິນ, ໄດ້ກ່າວວ່າ: “ໃນຖານນະທີ່ ພຣູເດັນໂຊລ໌ ເປັນບໍລິສັດຊັ້ນນຳຂອງປະກັນໄພຊີວິດ ທີ່ມີປະວັດຄວາມເປັນມາດົນນານ ໃນການດຳເນີນວຽກງານ ຢູ່ອາຊີ , ການເຂົ້າມາດຳເນີນທຸລະກິດທາງດ້ານການປະກັນໄພຊີວິດໃນປະເທດລາວ ຖືວ່າເປັນປະໂຫຍດຕໍ່ປະຊາຊົນລາວ ເພາະພຣູເດັນໂຊລ໌ ມີຜະລິດຈະພັນປະກັນໄພຊີວິດ ທີ່ຈະຊ່ວຍປົກປ້ອງຄຸ້ມຄອງ ແລະ ສ້າງຄວາມໝັ້ນຄົງທາງດ້ານການເງິນໃຫ້ແກ່ຄົນລາວໄດ້ທົ່ວເຖິງກັນ. ຂ້າພະເຈົ້າຍັງເຊື່ອວ່າ ພຣູເດັນໂຊລ໌ ຈະມີບົດບາດສຳຄັນຕໍ່ການພັດທະນາການໃນໄລຍະຍາວທາງດ້ານການບໍລິການການເງິນ ແລະ ການປະກັນໄພຊີວິດ ແລະ ມີການປະກອບສ່ວນໃນການຂະຫຍາຍຕົວຂອງເສດຖະກິດໂດຍລວມຂອງປະເທດເຮົານຳອີກ.”
ທ່ານ ໂທນີ້ ວິກກີ້, ຫົວໜ້າບໍລິຫານ ພຣູເດັນໂຊລ໌ ຄັອບພໍເຣຊັ້ນ ອາຊີ, ໄດ້ກ່າວວ່າ: “ມື້ນີ້ຖືວ່າເປັນບາດກ້າວທີ່ສຳຄັນສຳລັບ ບໍລິສັດພຣູເດັນໂຊລ໌ ທີ່ໄດ້ຂະຫຍາຍທຸລະກິດປະກັນໄພຊີວິດເຂົ້າມາໃນ ສປປ ລາວ ເຊິ່ງເປັນຕະຫຼາດທີ່ 13 ຂອງພວກເຮົາໃນເຂດອາຊີ, ເພື່ອຢັ້ງຢືນກັບຄຳສັນຍາຂອງພວກເຮົາທີ່ຈະສ້າງເຄືອຄ່າຍ ແລະ ສາຂາຢູ່ໃນໃນຂົງເຂດນີ້. ຕະຫຼາດປະກັນໄພຊີວິດໃນ ສປປ ລາວ ມີສັກກະຍະພາບສູງ ເນື່ອງຈາກວ່າການຂະຫຍາຍໂຕຂອງເສດຖະກິດ ແລະ ການເພີ່ມຂຶ້ນຢ່າງຕໍ່ເນື່ອງຂອງຊົນຊັ້ນລະດັບກາງ. ຈາກປະສົບການຂອງພວກເຮົາຫຼາຍກວ່າ 90 ປີ ທີ່ຢູ່ໃນພາກພື້ນນີ້ ພວກເຮົາເຊື່ອວ່າຈະສາມາດມີບົດບາດໃນການເປັນຜູ້ນຳກ່ຽວກັບການພັດທະນາດ້ານການປະກັນໄພຊີວີດນີ້ ເຊິ່ງພວກເຮົາຕອບສະໜອງຜະລິດຕະພັນທາງດ້ານການປົກປ້ອງຄຸ້ມຄອງ ແລະ ສະສົມທືນທີ່ເໝາະສົມໃຫ້ກັບປະຊາຊົນ ແລະ ຄອບຄົວຄົນລາວ."
ທ່ານ ນະລິນ ພົນ, ກຳມະການຜູ້ຈັດການ ແລະ ປະທານບໍລິຫານ ທະນາຄານ ເອຊີລິດາ ລາວ ຈຳກັດ, ໄດ້ກ່າວວ່າ: “ພວກເຮົາມີຄວາມຍິນດີຫຼາຍທີ່ມີ ບໍລິສັດປະກັນໄພຊີວິດພຣູເດັນໂຊລ໌ ມາເປັນຄູ່ຮ່ວມທຸລະກິດຂອງພວກເຮົາຢູ່ໃນ ສປປ. ລາວ ເພື່ອເປັນຫຸ້ນສ່ວນໃນການກະຈາຍການປະກັນໄພຊີວິດຜ່ານລະບົບທະນາຄານ ພວກເຮົາຫວັງວ່າຈະສາມາດບັນລຸ ການຈຳໜ່າຍ ພາຍໃຕ້ການຄວບຄຸມຈາກຊ່ຽວຊານຂອງ ພຣູເດັນໂຊລ໌ ອາຊີ ເພື່ອຂະຫຍາຍຖານທຸລະກິດທາງການຕະຫຼາດກັບສິ່ງທີ່ເຮົານຳສະເໜີ ແລະ ບໍລິການຂອງພວກເຮົາໃຫ້ກັບລູກຄ້າ ແລະພວກເຮົາເຊື່ອວ່າ ຈະສາມາດຕອບສະໜອງຄວາມຕ້ອງການການປະກັນໄພຊີວິດ ທີ່ຈະເຕີບໃຫຍ່ຂະຫຍາຍຕົວໃນອະນາຄົດຂອງປະຊາຊົນລາວ.”